Bokuədə məhkəmə diniə fəol Tural Allahverdiyevış de bə polisi mığoviməti ittihomi bə 20 sutkəninə zindonə cəzo məhkum kardə.

Allahverdiyev fevralə mangi 13-nə rujədə noməlumə şəxson tərəfo ıştə kə neziədə həbs kardə iyən dızdiə bə. Fevralə mangi 14-nə rujədə bə çəy xışəvandon xəbə doəşone ki, Allahverdiyev de bə polisi mığoviməti həbs kardə bə.

Allahverdiyev sosialə şəbəkəonədə de bo siyosiə məhbuson xıyzonon koməgi ianə gırdə karde, bo çəvon hırdənon məktəbi ovdımonon bə dast varde təklifon məşhur be. Sıvoy çımi əv Ğobustani zindonədə bə “Mısılmonon İbemonə Hərəkəti” rəis Tale Bağırzodə iyən diniə fəolon Abbas Huseynov iyən Cabbar Cabbarovi mınosibətədə təzyığon zidd etiroz kardedə be.