14-nə ruje ki, “Mısılmonon İbemonə Hərəkəti” rəis Tale Bağırzodə Ğobustani zindonədə ıştə ənəhardəti aksiyə dəvom kardedə. Çımi həxədə çəy jen Leyla İsmayılzadə xəbə doaşe. Əy de ıştə şuyə fevralə mangi 12-nə rujədə vindemonış kardə. Bə çəy sıxanon əsosi, çəvon vindemon Ğobustani zindoni rəis Avtandil Ağayevi kəbinetədə bə.

Լ․ İsmayılzadə votəşe: “Zindoni rəisi əmə ğəbulış karde iyən elon kardışe guyə Tale ıştən pidəşni bə kə telefon karde. Əmma vaxtı ki Taleşon varde, əy votışe ki ım duye, bəy icozə dodə nin telefon bıkə”.

Bağırzodə həmçinin ğeyd kardəşe ki, əv bə ıştə iyən Nardarani co məhbuson, xısusən Cabbar Cabbarovi mınosibətədə təzyığon zidd etirozi əloməti ğəzinə ənəhardəti aksiyə dəvom kardedə.

Bə Tale Bağırzodə jeni sıxanon əsosi de ıştə şuyə vindemoni əncəx 5 dəğiğə dəvom kardəşe, çımi bəpeştə Bağırzodə otağış tərg kardə. Ğeyd bıkəmon ki, Penitensiar xıdmət Bağırzodə iyən co məhbuson ənəhardəti həxədə məlumoton təkzib kardedə.