Xosə çəmə millət, xosə çəmə xəlğ ! Çoknəy həmə zındon SSR- i vaxti Nəvuz  bo əmə bə vey qılə qiraminiyə şoyvoy peqardə , dəvləti fayədə dəvoniyə nıbə id bey. Isət həni çoknəy vindon ım idi iqlə İroni xəlğon ney, həmən dınyo ve xəlğon dəvonidən. Imsor ım id Rusiya dəvlətiən dəvonişe , həmən ıştə keşəvərədə jiə bə həməy ım idi dəvoniyə xəlğon dastış qəte , bo əvono bı idə şoyvoyro har curə qirəvon  onışe. Sıxan ni, Nəvuz sof ironıjon ide, bə xosiyən tolışon ide. Çumçıko ım idi aşmard çe Zərdust peyğəmbəri bə dınyo çəş okardə rujiku bino bedə. Nəvuz de əvəsori bino bey, çəy bə zəmin po noy bino bedə, zəmini dim havz bedə, doon zizə oj kardən, ruyon de şurhaşuri şuredən, bılbılon de xosə vanqi pehandən, şoron de dastə epəredən, handən. Odəmon , do- çuyon ıştə zımıstoni cıli evatedən, odəmon nuə oləton tan kardən, do- çuyon havzə ranq səydən, odəmon dimon sıredən, de yəndı con votedən – con məsedən. Əve jıqo id har milləti , har xəlği ğəbulış kardə, ım idi dəvonidən. Rusiya dəvlət rəsmi ım idi ğəbul kardə, bı idi bənəy ıştə fərhənqi i vəslə diə kardə xəlğon vey yolə ğurb noydə, ım ğurb noyən bərmalə vinde bedə. Çoknəy Rusiya dəvləti binim ım idi dəvonyə bəştə şəhərvandon har curə qirəvon onedə, bıdə əvon ım idi penə fayədə dəvoniey bızınon. De jıqo Moskva şəhəri hukməti VDNX nomədə vırədə haftopenc numrəynə çodoədə ( pavilyon) bı idi dəvoniey har curə qirəvonış onışe. Bı idə şoyvoyədə dınyo 20 ( vist) qılə keşvəri tarixi şəhərvandon həşən. Bə çəvon ehdə bı yolə çodo dılədə bə har xəlği  dıqlə pavilyon doşe. Bı yolə çodo dılədə idə şoyvoy bətər çəşvində ko bey. Bə çəmə pavilyoni nav həmə xəlğon nımoyondon oməyn, bə əmə idə çəşruşinişon doy. Bı idə şoyvoyədə Ozobiconi keşvəri nımoyondonən həşedəbin. Əvon – Ozobiconi nımoyondon bı idədə ıştənışon bevəcə tono nişoşon doy. Bevəcə tonən əv bey ki, ıştə jen toyfonınşon omute vığandışone çəmə stendi kuti həşə əhəşon səpe. Im təxribaton de çəmə əhəşon pandinəti səkıştə bə hiçi- puç bekardə bey.

Jəqonəy bıvətiku, dustiətiku, iconətiku dəm ğandə ozobiconıjon ya Ozobiconi hukməti ıştə pıxəluzəti, ıştə bə çəmə xəlği rəvimoni fayə, suluki fayə çoknəy bey deştə Moskva Nəvuzə idi şoyvoyədə bərmaləş nişoş doy. Im təxriabati ğəziyon jıqo bin ki, ozobiconıjə milləti bıə moynon se bəjən bəçəmə Talışskiy pavilyoni nav oməyn, bəmə , bəçəmə dastpoçəniyon noloyiğə sıxananonışon karde, bə jen xəyləği qəvi danımə sıxanınoşon vote. Çəmə cıvonon iyən yolə sorə odəmon əvonışon de nəvozişi bə roşon doy, de çəvon əğılon dıl- təvazəşon karde, nozəşon karde, mande əvon ijən ıştə teləzəfə sıxanonku dastışon nıkəşəy. Azən bənəy Tolışi Diaspora Prezidenti ım təxribati ğəziyonım vinde, bə VDNX həmonə çodo xətoqordoniyə dastə odəmon zanqım karde. Əvonən bı koy əncomışon kəşəy, polison əmənışon detobə orəxnə ləzon hovozışon karde. Bə odəmi qınyə çi əve ki, ımon diəkə çanəndə behəyon , əməni iyo Rusiyadan dılışone ıştə koroği jintono oqəton. Demiyən jıqo çəmə kutisə ıştən ney, ışyə moynonışon vığande. Çəmə xəlği iyoşən ıştə pandinətiş nişoş doy, bə çəvon fayə enıqıniey. Çəmə xəlği piəy əve ki, əv ıştə dəvlətmədorəti onə, çəmə de moynon canq karde, de əvon tasıb barde məğərımon ni. Çəmə piəy ve penə fayədə bə dərhəl omə, tazisə omə çiyonin. De Xıdo zuy əmə əv çiyon həzo- həlbət bə dast bəvamon. Imi bəmə çəmə arealədə qeopolitika hımıcım votedə. Əmə bı qeopöolitika hımıcımədə sərzumon. Isət çəmə vədə  mandə eçın, ım de çəmə xəlği harujnə, har saatə, har ləzə bardə təbliğati dastkoy. Əmə ım koy hələynə vey penə fayədə bardəmon. Çəmə Tolışstonədə jiə xəlğ bəçəmə kardə koy çok vir səğandə. Çəmə kardə ko, əvoni bəçəmə hımıcımi tikəyən nez kardə, əvoni xaxanisə vardə. Xıdo rozi çəmə kardə koon ıştə bəhəri dodən. Əmə ımi çəmə xəlği rujbəruj bə siyasəti ton hımıcım kardeyədə bərmalə vindəmon. Har ləlqıl ıştə vavti rəsedə. Çəmə dəvlətmədorəti bərpo kardeyən bənəy ıştə vaxtədə rəsə ləlqıli bəbey. Vaxt bome çəmə xəlğ əv ləlqıli bəçıniey .Bə ruji veyən vaxt mandəni. Az bəştə xəlği sənibəton de Nəvuzi dame çəşiruşni dodəm. Xıdo çəmə dusdton şo, çəmə deşmenon zəlil bıko. Bıji səbəsojə Tolışston!

İsmail Şabanov

Rusiya Tolışon Diaspora Prezident