Isət jıgo gıləy ruj bedəni ki, Boku dovləti Kutləviə İnformasiyə Vasitonədə məmləkətədə intihar hodisə barədə məlumat dərc nıbo. Hətto Boku Metropoliteni rəhbəriyyət bə şəhrvandon muraciət karde məcbur bıə ki, əvon ıştə jimoni ğədi bıznon, bə jıgo hərəkəton ro nıdon.

Hokumətən ım intiharon səpe ya de sukuti dəvardedə, yaanki çəy əsl səbəbi niyo kardedə. Məsələn, dəvardə rujonədə Əhməd Nəsirovi metroədə ıştənış bə ğətari və şodoəşbe, təsadufən səlomət mande. “Azadlıg.info” nıvıştedə ki, çəy jeni ım hərəkəti səbəb kredit ğarzi doe nızne gorə banki əy şantaj kardeş votə. Əmma hokumətpərəst sayton nıvıştedən ki, Nəsirovi sə guya bə gij ome səbəbiku ğətari roy səpe dəgıniə.

Ozobiconi Daxili Koon Vəzarəti məlumat doəşe ki, ım sori  6 mangi dırozi Respublikadə de intihar hodisə əloğədor 500 cinayətə ko bino kardə bıə. Ponə sori ım curə koon mığdor 658 gılə bıə. Ozobiconi Hokuməti statistik rəğəmon çanədə səhih beyən bə həmə kəsi çok məlume. Əgəm bə ım rəğəmi bovə bıkəmon, jəgo Respublikadə de miyonə hisobi təğribən har ruj 2 nəfəri intihar karde məlum bedə.