Bə ParsToday informasiyə agentəti tolışə saytədə pevılo bıə məlumoton əsosi, “The Lancet” jurnali orəxnə 10 sori əhatə kardə tədğiğati nəticəon bə oşko bekardəşe ki, dınyoədə xərçəngə noxəşinon miğdar sorbəsor ziyod bedə. Im tendensiya AR-kuən yan dəvardəni. “İslamazeri.com” sayt nıvıştedə ki, orəxnə 14 sorədə ım noxəşinon miğdar 2005-minə sori 23 həzoku, 2018-minə sori bə 48 həzo rəsə, yəni 2 kərəsən vey ziyod bıə.

Respublikadə jıgo noxəşinon bə devləti hisob mualicə karde ro vey penə fayədə səhiyyə şərait soxtə bıə. Milli Onkologiya Mərkəz bə dınyo standarton cəvob doə səviyyədə onoə bıə. “Azadlıg.info” sayti ım devlətə səhiyyə mualicəxonədə rışvəxorəti, doktoron bə noxəşinon munasibətədə geyri-insonə hərəkəton ro doe, çəvon ğeyri-professionaləti barədə gıley məğalə dərc kardəşe. Məğalə muəllif ğeyd kardedə ki, hejo jıgo negativə vəziyyəti səbinə har sor de 10 həzoon noxəşinon bo mualicə ro bə xariciə məmləkəton, əsasən bə İroni mərizxonəon və nodən. Çunki ım Onkoligiya Mərkəzədə hic kəsi bepul mualicə kardedənin. Doktoron xidmətə pul, analizon ğıymət ce Avropa mərizxonəon səviyyədəy, əmo mualicə səviyyə xeyli sarue. Muəllifi nezə odəmonədə gıley boştə noxəşini mualicə ro 40 həzo mənot xarc kardəşe, əmo ey şifo peydo karde zınəşni.

Co gıley bə xərçəngi mubtəlo noxəşin Milli Onkologiyadə mualicə besəmər bıe səbəbiku bə Təbriz şe məcburiyyətədə mandə. Çəvrey Beynəlmilələ Mərizxonədə 2 mangnə mualicə nəticədə şifo peydo kardedə, və bımi ro çeyku həmməyəvo cəmi 14 həzo mənot xarc beşedə.

Respublika Milliə Onkologiya Mərkəzədə bə jigo beaburinə vəziyyəti orəx doe ro, məğalə muəllif deştə çand gılə dustə ruşinəfikron bə Səhiyyə Vəzarəti muraciət kardedən. Əmo çəvon ım təşəbbusi hiç gıley effektış bedəni.

Əlavən bıvotəmon ki, çe Milliə Onkologiya Mərkəzi direktor çe Prezident İlham Əliyevi day Cəmil Əliyeve.