De Milli Şura təşəbbusi oktyabri 19-ədə Bokuədə etirozə miting dəvunie cəhd, və ey Əliyev hokuməti tərəfo de hoziəti vılo karde, xeyli siyasiə fəalon polisi tərəfo dəstgir bıe, bə inzibatiə cəzo və bə cərimə məruz mande, bə Avropa ictimaiə təşkilaton etirozi səbəb bıe.

Avropa İttifaği ali numayəndə Federika Mogereni mətbuatə xidməti bəyon kardəşe ki, Boku hokumət ım aksiya gardışədə bə əməl omə zorinə hərəkəton bəpe təhğiğ bıkardo, dastgir bıə etirozkaron ozod bıko. Ey həmən AR hokumət dəvət kardəşe ki, de bəşəri huğuğon təminati əlağədar bəştə səpe pegətə ehdədarion bə vırə bırosno.

Çe Avropa Şura bə Bəşəri huğuğon dair Komissar Dunya Miyatoviç Boku polisi de numayişkaron bədə rəftor məhkum, hokumətən dəvət  kardəşe ki, polisi jıgo əməlon vəy bısəno, şəhrıvandon sərbəst gırd bıe huğuğon təmin bıko, bə inzibati cəzo məhkum bıə dincə etirozkaron çe zindono vado.

Çe Human Rights Watch bəşəri huğuğon təşkilati bə Avropa və Asiya dair direktor Giorgi Gogia`n ım məzmunədə bəyanat doəşe, Boku hokumət dəvət kardəşe ki, bə ıştə ehdə pegətə təəhhudon əməl bıkardo.

Bə Repressiya və İşgəncəon Əleyh Komitə sədr huğuğə mudafiəkar Ogtay guləliyevi ıştə “Fasebook” səhifədə nıvıştəşe ki, oktyabri 19-ədə devləti səviyyədə cinayət vağeə bıe. Şəhrıvandon ıştə Konstitusion huğuğonku istifadə karde cəhdi, əvonış polison tərəfo bə işgəncə, təhdid və təhğiron məruz ogəte. 300 nəfər dəstgir bıe. Çəvonədə 30 nəfər bə inzibatiə zindonə cəzo, kamiku 22 nəfərən bə 50 mənotiku tosə 500 mənot cərimə məruz mandin. “Azadlıg.info” dərc kardə ım bəyonatədə guləliyev xəbə dodə ki, əvon bə hokuməti jıgo ğeyri-ğanuniə əməlon motijə nibəmanden, ım hərəkəton təhlil karde ro məşvərəton təşkil bəkarden.