TolishMedia informasiyə agentəti muxbir xəbə doedə ki, Almaniyədə gıləy etirozinə aksiyə dəvoniə bıə ki, ozobiconıjə fəolon iyən siyosiə mıhociron təşkil kardəşone.

Bə pevılo bıə məluməton əsosi, etirozinə aksiyədə iştirok kardəkəson çı Almaniyə kansleriku çı Ozobiconi iyən çəy diktator İkham Əliyevi zidd sanksiyəon tətbığ karde tələb kardəşone. Çı aksiyə iştirokəkəon gıləyni ozobiconıjə jurnalist iyən navkonə siyosiə məhbus Əfgan Muxrarlı be ki 2017-nə sori mayə mangədə Tbilisi şəhərədə Boku rejimi kəşfiyoti xıdməton tərəfo dızdiə bıə be.

Bə yod dəğandəmon ki, Ozobicon insoniə həxon darışte xoto vaxtbəvaxt bə şiddətinə tənğıdon məruz mandedə. Çımi həxədə AŞPA-də çand gılə ğətnoməon ğəbul kardə bən.