Zinə, iyulə mangi 12-nə rujədə çı Boku rejimi nubətinə avanturə nəticədə çı Ermənistoni iyən Ozobiconi hərbiə ğıvvon arədə hərbiə əməliyoton sənibəton ziyod bıən.

Bə yod dəğandəmon ki, ozobiconıjon cəhd kardəşon be çı Ermənistoni marzi ovaşte iyən erməniə movgeon gıləyni gətım karde, əmma çı ermənion şiddətinə cəvobi bəpeştə ıştə “UAZ” maşini iyən çand gılə kıştə bıə əsgəron haşteədə bəştə movgeon ogardə bən. Çımi bəpeştə Ozobiconi hərbiə ğıvon erməniə movgey gətım kardey co gılə cəhdışon kardə, hətto tankonku istifodə kardəşone, əmmə igləliə nəticə əv bıə ki, çand gılə əsğəronən kıştə bən. Bə pevılo bıə məlumiton əsosi, erməniə tərəfi hiç gılə kıştə yaanki yarəjə bıə sərbozonış ni.

De həyfi bəpe ğeyd bıkəmon ki, Ozobiconi ləşğərədə kıştə bıə sərbozon gıləyi ijən çəmə tolışə baləy. Im fakt vey çok nişo doedə ki, Boku diktatorə rejim bə Ermənistoni əleyh cangiku sui-istifodə kardeədə bə tolışə xəlği mınosibətədə etnosidi iyən genosidi siyosəti dəvom kardedə. Hiçən təəcubin ni ki, har səfə ki Ermənistoni iyən Ozobiconi arədə hərbiə əməliyoton vağe bedən, xəyli tolışə zoən kıştə bedən, çunki Boku diktator Əliyev tırkon vırədə çəmə xəlği baləon bə imimə cəbhə vığandedə iyən de ım vositə “tolışə problemi” həl karde cəhd kardedə: ehanə tolışon nıbun, tolışə problemən nibəbe.

Xosə tolışon, ijən pidəmon bə yod dəğande ki, ım cang çəmə cang ni, tolışə zoən gujdancənə maşini material nin ki, bo Boku rejimi iyən diktator Əliyevi manəfey gorə kıştə bıbun.

Əmə bəpe çəmə baləon, çəmə zoəon jimoni bo ozodə Tolışıstoni maşkinə ruji hifz bıkəmon.