Çılə şəv. Çılə, ya Yəlda şəv Zəmini dimi xəşixuni çəmədə, sori qırd dırozə şəve. De həşi qarde çəmi aşmardə sori, deyə manqi iminə, azərə manqi orəxnə, bə Nəvuzə idi se manq mandə bıə qıləy şəve. Çıl ruj damədə şıə Yolə çılə (de miladi aşmardemoni – 21 dekabr- 29 yanvar) iminə ruje. Peşo 20 ruj damədə şəv – ruj davardə Rukə Çılə damedə. P.eş rukə çılə detobə əvəsori dame i manqən Təylə zımıston (Çılkındə sutə manq) bedə.

De Yulianə aşmardi dekabrə manqi 20- ku bə 21-i ovaştə şəve. Çılə ironə xəlqon ide, bo əvon vey molyətin iyən ğurbinə şəvonədə qıləye. Sıxan ni, de zərdustəti anqıl nıbə xəlqonən ımruj əy id kardedən, mande zıney lazime ki, Çılə şəv sof bə zərdustəti, bə Zərdust peyğəmbəri bovə kardə xəlqon, çeəvon ənuzon ide. Çılə şəvi ideya ruşnə çe toyki səpe bac omeye. Həmonə şəvi Ahura Mazda de Anqramanyu vey yolə perızış kardə, çəyo bəy bac omə. Çılə şəvədə voə voyey bə şoy-voyəti səbin bedə. Həmonə şəvi xıyzon bə ico qırdə bedə, de dılisoxtəti id kardedə. Həmonə şəvi Tolışə diyorədə (məholədə) jivo pərəndəku çılımə patey mij heste. Çoknəy zındəmon, kəfşəni pərəndon tolışon zımıstonədə hardedən. Həmonə şəvi kəfşəni pərəndəku çılımə( pərəndə təm-tum kardən, de veynə ləvənqi patedən, ləvənqinə ovi dılədə patedən, de peşə polo bə dastəxon doydən, qıləy masxorədən ləvənqinə ovi noydən)patey simvolikə mənəş heste.

Çılə şəvi simvolonədə qıləyni (havzə) zımstoniye. Tolışon tovıstoniku qıləy zımıstoni oqətdən bo çılə şəvi. Çılə şəvi əy miyonədə de çəxo bə dı vırə poə kardən. Hejo hazəən ıştə nomış çı idiku səşe.Əy bo zımıstoni oqəteyro havzə nomış bə zımıstoni ovaxtəşe. Navədə çoknəy binim votəmonbe¸bo pəvəndiyə kinə, bo nuə kəxıvand bıə cıvononən zımıstoniyə baxşə doə bedə. Çılə dastəxonədə həzo – həlbət çılımə, zımıstoni, vizə xəvlo, paxlava, həşiqardışi donə, şini bıənine.
Peş Yolə Çılə Rukə çılə damedə. Rukə Çılə 20 ruje, dekabri 22-iku detobə yanvari 29-i dəvom kardedə.

P.S.

Nıso Tolışstonədə bə yolə çılə Yəldə votedən.Imən Yoltə – Rukdə sıxaniku bə miyon omə.

Diana Monrgomeri