Rusiya Federasiya paytaxt xosə Moskva şəhərəd Tolışon Diaspora dıhəzo havdəminəni sori dekabırə manqi çoədə OTV (Ozodə Tolışstoni Vindəsədo) nomədə YouTube TV kanalışon oneşone.

Vindəsədo oneyədə Moskvadə jiə tolışi dastpoçəninə fərzənd həmə ico həşəyn. Yolikuş qətəşe bə ruk, əvon həmə oməyn bəyəndışon dast dahaşteşone OTV nomə bo ıştə vindəsədoşon oneşone.

Im vindəsədo kıqrt qılə vaxtədə tolışon aradə bə yolə ğurb nışte. Vindəsədo se zıvonədə, Tolışi, Rusi iyən Tırkə zıvononədə bərnomon pevılo kardedə. OTV həm siyasi, həm fərhənqi, həmən Tolışə zıvoni ovc kardeyədə ve qılə saxtə koy jintono dəşə.

OTV əhəşon ımruj ıştə se sornəni movardəruji dəvoniyədəy, ıştən bə ıştə hədəyon mandən ki, ım se sor kəynə davarde?!. Əmənən ıştə tono bə OTV əhəşon çəşirişini doydəmon, Xıdo bə şımə ovand bıdo votedəmon! Çe əmə bə şımə qırd yolə əve ki, şımə Xıdo rozi kırt qılə vaxtədə Tolışstoni paytaxt Lankonədə bə ovəynə beşon! Çəşonon ruşin!
Tolish Media