Ozərboycon respublikə pırezident ısət şe-şe deştə bıvə Ərdoğanı həmro bə Ermənionyo məktoboni vığandedən ki boən ivrədə çəmə kali marzon mıəyən bıkəmon, aeropılanon pəreyo iyən əloğon təşkil kardeyo hərəkət bıkəmon. Bevəc ni, har milləti ıştə səbarzəti məğsədon gorə hərəkət kardedə, jığoən bəpe bıbo.

Məntəğədə dəvardə cangon milləton arədə siyasi marzon iyən moli-təcorəti vəziyəton dəgiş kardedən, har gıləyən boştə mənfəəti gorə bə hərəkəte. In hadison iyən tarıxi jığonə gardış həmmişə dıvrandə heste. Əmmo hestin arədə xəlğoni ki ıştə gin kardedən, ne ın ki mənfəətışon nibəbe bəlkəm məhvən bedən.

Tarıxədə co xəlğon nomi vote lozım ni, əmə ıştənsə, çəmə Tolışon əcumlədə xəlğoni hestin ki məntəğədəbıə ulkəon siyasəton hərəktdə iştirok kardışone, əvən əncəx bo marde iyən ıştəni məhv karde ğıyməti. Ğərəbağı dəvardə cangədəən jığo be, çanə ki dılsutə odəmon fəryod jışone, şə kəson şin, nımandin, dəşin bo marde.

Imruj ki Turkiyə ıştə həvoyə əloğon iyən biznesi de Ermənion bino kardedə ijən Boku ıştə marzon de Ermənistoni mıəyən kardedə, az birdən bəçəmə şəhidbıə-mardə əsgəron yod mandəm. Beçoə Tolışə cıvonon, şımə həmonə siyosəti roədə kıştə bin ki şımə dəkandə vıronən oveyzi roədə ğərorışon do, ki şe-şe şımə nom iyən yodən poymol bıbo.

Xıdo rəhmətkə Tolışə merdon, həvəse ki pıə-inon tikəyən bəştə Tolışə xəlği ruşinfikon guş bıdən iyən nıhaşton əçəvon balon bışon bo marde, bo kışte, bo məhv bıe. Isət vindəyon ki siyasətmədaron həmmə ıştə ğənimbıəyon ğəniməton ivrədə baxş kardedən əmmo çəmə Tolışon ğısmət hejo cangədə marde iyən məhvbıeye. Ime Boku-Ankara siyasət iyən ıme Tolışon tale.

İsa Tolış
Offenbach am Main