Boku respublika orəx çoknəy bəbe barədəım pars ve odəmon coni həyvonidə, əvoni norohət kardedə. Ko bımədəy ki, Boku respublika beməxə prezident İlham Əliyev həni qırd həpəroy votedə, həmən əy həmə sıə riyonış darıştəşə, hastəşe. Sıxan ni kali siyasətmədoron votedən ki, peş İlhami bə Boku respublika sərtaxt çəy jen Mehriban Əliyeva boməy. Mande ımən qılə sərisofə sıxan ni.

Bəçəyro Boku respublika tale ısət Bokuədə ne co vıronədə tazisə vardedən. İzrail de Yoləbritaniya iyən Amerika İconə Ştaton bə Boku bənəy ıştə əbjori diə karde holədə İron de Rusiya bənəy ıştə zəmini diə kardedən. Əve çı pesoxtə kvazi keşvəri ayəndon çe Rusiya iyən İroniku bə şıkırən. Jıqo vinde bedə ki, İlham Əliyevi Boku respublikada kardə prezidendəti kırt qılə vaxtədə bə sə bəqıniye.

İlham Əliyev hələ ıştən bənəy əbjori çe kobəsoni dastədə bıbuən çəy nıxtə çe Rusiya iyən İroni dastədəy. Qirəm kıqrt qılə vaxtədə Boku respublikada Rusiya de İroni har çi tazisə nıvon bəvədə ım pesoxtə Azərbaycan nomədə keşvər həm bo İroni həmən bo Rusiya ve yolə xəto varde bəzıne, jəqonəyən vinde bedə əvcon çanəndə xətonışon vardə hələən vardedən.

Sıxan ni İlham Əliyev ıştəni jıqo bardedə ki, ki bıvoton əv har çiy ıştə çəşənəvo jintono oqətedə, har çi çəy kontrolədəy. Orəxnə soron bə İlham Əliyevi çok vir səğandon bəvindeyon əy çoknəy tuləkış kardə. Çəy jıqo tulək karde bə şımə hiçi votedəni? Əve ve tolışon hələn bimim ım beməxə bo ıştə mızəffərə prezident zınedən əy bızonon, əv hiç ğəzənfərən ni nrkini mızəffər.

Ki bə İlham Əliyevi bə çe əy xıyzoni peştıpurəti kardedəbu əvon çe Xıdo peştipuriyətiku diyəron. Reqionədə ve çiyon co curə bəben. Oxo Ukrayniya kaşiyon əməni bəpe oğo bıkə. Ukrayniyədə har çi tazisə omeyd, jıqo çəş kardə bedə pozədə əyo çe Zelenski taxtiku əsər – əlomət əmandıni. Ha bəvədə Boku respublikadə çiçon bəben əy videyədəy ve xonəxon bə ıştə çəşon bovə əkənin!

Şəmsəddin Museyibi