Çoknəy zınedəmon Boku respublika ıştə pesoxtə keşvəri hışkə marzonış bastə. Imən de əy anqıle ki, Boku respublika de İsraili doə dəsturi ım koon reqionədə qeopolitika hənəkon ləğomo bə ıştə dast səykuye. Bəçəyro Boku respublika de ıştə beməxə prezidenti hiç kəynə bı pesoxtə keşvərədə yol bıənin, əbıninən.

Oxo əvon əyo de İsraili iyən Yoləbritaniya dıli piyəy əyo nıştən. Oxo əvon bo iyo jiyə mərdumon jimoni bə rujəruşni bekarde ne, bo ıştə kefi, bo ıştə rujoqari bə sofi bekardero nıştən. Əve hiç kəynə ıştə kədə ıştə xıyzonədə yoliəti nıkardə İlham Əliyev çe kobəsoni tarsiku marzon nə baste nəən oj karde bəzıne. İlham Əliyev kom vırə sıpəy ki, çe İsraili tarsiku qılə çiyro çe əvon ray nıbə bıkə.

Əve Boku respublikadə jiye tovədə mandə mərdumon, tolışon, ləzqion, taton, avaron, udinon iyən jıqo çand qılə mərdumon zınedənin çiç bıkən. Bəçəyro ım deşmenə hukuməti çəvon bərə – bəndəronış çok epıştəşe. Qirəm navko i xonəxo bə Rusiya ya bə İron əşiybu, çəyo bo ıştə xıyzoni cılıməy nun əvəybu, ısət həni əvon ıştə xıyzoni tono siyodim mandən. Çı jıqo siyodiməti qıno İlham Əliyev iyən çe əy bədəxlaqə xıyzonikuye.

Əvon bo ıştə kefi Boku respublikadə jiyə mərdumon, çı pesoxtə keşvəri şəhərvandonışon bə coni həxışon vardə. Jıqo bışu kırt qılə vaxtədə Boku respublikadə vəşyənəti , kaxti ebəqıniye, çoknəy binim vindedəmon ım vəşyənəti həni eqıniyə. Hiç viji çe şəhərvandon bə jıqo saxtiəti eqıniyero İlham Əliyev bənəy qılə prezidenti mu qenc kardedə.

Əv nə mu qenc kardedə nəən ıştə kefi darıştedə. Bı odəmi lazime ım mərdumi de İsraili doə dəsturi eğando bə ku – kəməndon, çoknəy binim eqıniyən. Rusiya bıbo ya İron , əvonən de ıştə keşvəri de ıştə mərdumon koy ğalin. Isət diə bıkəmon ımon ( Boku respublika yolon) çiç kardedən.

Məvuji bı pesoxtə keşvərədə bı nezonədə ve yolə bəyəndıqıniyəyon çəş kardə bedən. Əmənən ıştə tono bə mərdumon ıştə coni, ıştə cəni çı jıqo despotonku roxniyero ovand orzu kardedəmon. Xıdo bə odəmon koməq bıbo!

Şəmsəddin Museyibi