Ozərboycon respublikədə Şiəon ımrujnə vəziyət (2-minə Baxş)
Hac Tale Bağırzodə; Ozərboycon respublikə Şeyx Nemər
Jəğo ki dəvardə baxşədə votdımone, Ozərboycon respublikədə Boku hukumət de ın ulkə dindaron iyən Şiə mısılmonon ve gonə əmniyətiyə rəftorış heste. Şiə hərəkət iyən Boku əmniyətiyə rəftori arədə Hac Tale Bağırzodə nom ve bə guş omedə. 2015-minə sorədə ki Boku davləti əmniyət təşkilat bə Nardaran məntəğədə İmam Huseyn(ə)ı əzodaron hucum bardışe, Hac Tale Bağırzodə gətə bəy iyən əvi bə 20 sor zindon məhkum kardışone.
Həmonə sori hadisəondə ki Boku əmniyət təşkilatı məxsus ğıvvon bə əzodaron tərəf hucum bardışone çand kəs Şiəonən şəhid bin iyən ve kəsonən yarəjə bin. Əlbəttə sıvoy Hac Tale Bağırzodə çand kəs co əzodaronən gətə bin iyən bə həbsxonə vığandə bin. To bə ımrujən ve məhkəmə dakyomenton ın hadisədə zindonbıə kəson ayilonyo oj bedən ki məhkəmədə bə əmniyəti parson cəvob bıdən.
Hac Tale Bağırzodə Ozərboycon respublikədə jiyə mısılmonon vəhdəti cərəyani əsliyə lideronku iyən gıləy patriyot ruhani be ki çı Vəhabiyət, Təkfiri iyən Səhyonist gorop cərəyanon zidd mıhozirə handəşbe. Hac Tale Bağırzodə bə vaxtiku zindonədə məhbus mandəy iyən ve rınciyəy, iyən əçəy ayiləən ve əmniyətiyə təsiraton jiədəin.
Ozərboycon respublikədə Hac Tale Bağırzodə mədəni iyən ictimai vırə de ın ulkə mısılmonon lideri unvani bə Şeyx Nemərı oxşəş doydə, ıme ki əv bə Ozərboyconı Şeyx Nemər məşhur be. Əlbəttə ki ın ulkədə ve yolə alimoni İslam İyən Şiə hərəkəti gorə gətə bən iyən Boku hukuməti əmniyət təşkilati məxsus ğıvvon təsirati jiədə əzob kəşəşone, əcumlədə: Hac Nohbala Rəhimov, Hac Zulfuqar Mikailzodə, Hac Ağayev, ijən Hac Vuğar İskəndərov, Mohəmməd Əli Axondzodə, Hac Ğasimov, Fərhad Mirza, Əli Nur iyən Hac Əbolfəzl Bonyadov.
Boku davlət ki ıştəni de gıləy sekolar davləti unvan zınedə ın ulkədə dindaron iyən Şiəon navədə “dini zidd siyasət”i bə nav bardedə ki ın siyasət de Bokuədə zindonədə bıə kəson itirazon dim bə dim be. In vəziyəti idomədə Əlvəğt nomədə agent dəvardə mangədə ilon kardışe ki Ozərboycon respublikədə jiyə mısılmonon lider Hac Tale Bağırzodə bə vəşyəni tətil beşey.
