Hərbi prokuror Xanlar Vəliyev inən Qəncə navkonə icra sərdor Elmar Vəliyevi boə Şahmar Vəliyevi vəynə dələdızdətiədə ittihom bə Cəfər Əliyevi məhkəmədə qəpış jə.

Ey, hərbi prokurori boəş ittihom kardə. Şahmar Vəliyevi əçe kə, maşin, boğ inən əlidə çiyon çey dasto seyış votə. Cəfər Əliyevi lo Boku Qonə Cinayəton Məhkəmədə diə kardə bedə.

İyuli 4-də de hakim Azər Paşayevi sərdorəti dəvonə məhkəmə iclasədə Cəfər Əliyevi plastik lulə istehsali ro lazım bə material (“kroşka”) biznesi məşğul beş bəyon kardə.

Həmonə məhsulon İronikuş vardə. De Cəfər Əliyevi sıxani, holiədə bın koədə zərərkəşəy ğismədə zınə bə – Şahmar Vəliyev, Elnur Qəhrəmanov, Sadıq Yusifov, Vaqif Rzaquliyev inən Əkrəm Əliyev bey “kroşka” ro pulşon doə, eyən ha səfə İroniku vardə malış bəvon rosnə. Əmmo oxonə səfə pulon bə İron bo molsoyb Əkbər nomədə xonəxoş vığandə, əv çe miyono beşə, bə zanqonən cavobış doə ni.

Pul soybon binoşon kardə məhsulon əçeku tələb karde, mıddəti bə peş şikatşon kardə. Cəfər Əliyev İroni səhrvandi ey bə dast dənoe əvış bevəcə vəziyyət eğandə bə peş ey İntihor karde pieş votə. Cinayət koədə 5 kəsi zərərkəşəyonku həmməyəvo 1 milyon dollarisə vey pul iddio bedə, çimiən təxminən nimə – 580 həzo dollar Şahmar Vəliyeviye.