2020-minə sorədə Ğərəbağı 2-minə cangiku bə peşt Ozərboycon respublikə hukumət cəhd kardışe ki ıştə ulkədə jiyə xəlğon bə bovəmandəti bırosno ıyən bəvon bıvotdo ki əçəvon ulkədə bıə hukumət bə jığonə ğıvvətmandəti iyən zu rəsəy ki bəzıne ıştə ulkə ceogırafiyə iyən geopolitik sərhəddon inkişaf bıdə.

İlham Əliyev ın 2-sorədə cəhd kardışe ki ıştəni iyən ıştə ayilə Ozərboycon iyən məntəğədə təblığ bıkə ta ın ki əçəy ulkədə ki əlbəttə mıxtəlif xəlğon ulkəye İlham Əliyevı deştə səbarzə lideri unvani ğəbul bıkən. In təblığon zınedəbin ki ın pırezidenti ayilə de ğəhrəmanə goropı unvani iyən bənə gıləy simboli nişo bıdən.

Əmmo Ozərboycondə 2 gılə xusyət heste ki Əliyevi təhlilon xərob kardedə, ın xusyəton gıləy Məzhəbe, gıləyən mıxtəlif Xəlğoni ki ın ulkədə jiyedən. In 2 gılə xusyəton icozə doydənin ki Əliyev de rohəti ıştə pılanon bə vırə bırosno. Jəğo ki ımsornə muhərrəmə mangədəən şohidimon ın Şiə məzhəb be ki Əliyevı təhlilon bəiyəndı jəşe.

Mıxtəlif xəlğoni bənə Tolışon, Lezgion, Avaron, Taton iyən co milləton ki ımrujnə Ozərboyconı nom ulkədə jiyedən ve sorone ki ıştə mədəni iyən siyasi məğsədon rəse gorə hozı bedən ki ıştə xalon bıstənon çı hukumətıku. In xəlğon hərəkət ımruj çı Tolışə milləti arədə ve ciddin iyən de yəğini Tolışə xəlği tərəfiku unvan bedə.

Şiə məzhəbi tərəfdaron ki əlbəttə de mıxtəlif xəlğon xusyəti omojən bən ımruj bəzınen ki İlham Əliyevi hukuməti divoon arışton. Əgəm Əliyev iyən əçəy ayilə fisodkoətionku dəvardəmon əlbəttə ın 2 gılə xusyəti yəne Məzhəb iyən kam bə Xəlğon xusyəti kənoədə Ozərboycon respublikə daxili bevəcə vəziyətiən çı ın ulkə opozosiyonı tərəfiku əlovə bıkəmon.

Ime ki ımruj veynə siyasətmədaron iyən ın hissədə təhliləkon bə ın nəticə rəsəyn ki Ozərboycondə İlham Əliyevı hakimbıə system arıştedə iyən ın ulkə əmniyəti bə kırizis dəğandedə. Jəğoye ki bə 2020-minə sori Ğərəbağı cangi nəticə fəxr karde nibəbe, iyən Ozərboycon respublikədə ve gonə dəgişətioni şohid bəbemon.

İsa Tolış