Bokuədə ğisasəti zəminədə kıştə bə Kikboksinq dınyo çempion, 38 sininə Zaur Yusifovi ğətli band məhkəmə odırniəyon bino bən. Əçe ğəsdədə ittihom bə 2000-minə sori təvəlludin Samir Şirəliyeve.

Zaur Yusifov ıştənən nav kıştə be ğətlədə ittihomi dəstqir kardə bəbe. Əv, kriminal aləmədə bənə “Lotu Quli nezə odəm” inən “Emin 444” (avtomobili numrə qorə) zınə bə Emin Səfərovi kışteədə taxsikor be. Xeyli mıddət bın kışte ko qorə Həsən Tağıyev nomədə dr əlidə taxsikor zınə bə xonəxo şəxslə bə ico muhakimə bə Zaur Yusifov oxoədə bəraətış sə be. Əv, 2021-minə sori oktyabrədə de bəraət hukmi məhkəmə zaliku bə ozod kardə bəbe, bə Həsən Tağıyevisə 18 sor dəstqirəti cəzo doə bəbe.

Hukmiku norozi mandə zərərkəşə tərəfən, bə prokuratura apelyasiya protestış doə be. Boku Apelyasiya Məhkəmədə odırniə kon bə orəx nırəsə Zaur Yusifov bə ğətl rosniə bəbe. Əçe ğətli qorə holiədə bə məhkəmə və bekardə bə 22 sininə Samir Şirəliyev mərhum Emin Səfərovi xala zoe.

Avqusti 25-də məhkəmədə ittihim akt elan kardeədə Samir Şirəliyevi tifanq se ro Dılətonə Kon Vəzarətikuş icazə se məlum bə.

Məğəzenədə ğətlış bə vırə rosnə.

Samir Şirəliyev bın ğətli qorə de Cinayət Məcəllə 120.2.4 (de xususi beəmonəti inən ya umumi təhlukəninə ro ğəsdo odəm kışte) 228.4 (brğanun sardonə silah bə dast varde, oğəte) maddon ittihom bə nav doə bə.