Gəncədə fəaliyyət nuşu doə, “dunyaninsesi.az” sayti rəhbər Ərşad İbrahimovi qətə be votə bedə.

Bın barədə əçe boə Turan İbrahimovi məlumatış pevolo kardə.

De əçe sıxani, Mıtəşəkkil Cinayətkoəti Vəynə Mubarizə İdarə (“Bandotdel”) koəkon Ərşad İbrahimovşon Gəncəku bə Boku bardə.
Dey bə ıco, Gəncə Gigiyena iyən Epidemiologiya Mərkəzi sər həkim Huruyət İsmayılovan bə Boku bardə be votə bedə:

“Əçeku bə Ərşad İbrahimovi əleyh ifadə sə bə. Əv, çımı boə əçeku 2021-minə sori 200 mənot pul se vote məcbur kardə bə. Guya çımı boə əçeku peso inən pulış tələb kardə. Əgəm, həğiğətən, joğo qılı çiy bəbusə, bəvədə boçi bo şikat karde 3 sor çəşış kardə? De çəməku bə məlumati, ə zənən tosə Boku ome məsələ kon vırədə beku xəbəş bəni”.

Ərşad İbrahimov de Cinayət Məcəllə 182.2.2 (de tars-larzi tələbkarde – təkrar kardə beeədə) maddə ittihom bedə.

Dın maddə əv 5 soriku tosə 10 sori ozodətiku məhrumkardə cəzo se bəzne.

Ərşad İbrahimovi barədə bo sıftənə istintağ mıddəti ro 4 manq həbs ğətimko tədbir vıjniə bə.

Ərşad İbrahimovi əvlodon əçe polison həxədə nıvıştəyon qorə navkoən bə “Bandotdel” bardə, əyo nıvıştə materialon saytiku mole məcbur kardə be votedən.