Fevrali 22-də Avropa İnson Huğuğon Məhkəməi (AİHM) çe Azərbaycaniku vığandə 4 ərizə band ğərarış elan kardə.

Şikat bəkəyon Rasim İsaqov, Əli Abdullayev, Mübariz Abdulkərimov, Rauf Abdurəhmanlı ozodəti iyən məqınəti, ifadə ozodəti huğuğon mudaxilon iyən ədalətinə məhkəmə həxon darıştə be bəyonşon kardə.

Ərizəvononədə Ə.Abdullayev, M.Abdulkərimov iyən R. Abdurəhmanlı Avropa Konvensiya 18-minə maddə darıştə beku şikatin bən.

R.İsaqov isə vərəğon pevolo karde qorə inzibati ğaydədə dəstqir kardə bə.

Xalq Cəbhə Partiya uzv Rasim İsaqov 2014-minə tarixədə de İnzibati Xəton Məcəllə 39.1-minə (navsəçın və ya referendumi qorə təşviqati barde ğaydon darışte), 296-mınə (hırda xuliqanəti) iyən 310-minə (bə polisi ğanuni tələbi tabe nıbe) maddon əsas 5 sutka inzibati dəstqir cəzoş kəşə:
“Rasim İsaqov bo bələdiyyə səçınon 1 ruj mandə “Bey şedəmon?” nıvıştə vərəğo pevoloş kardə.

Əv,bə polison vərəğon pevolo karde oğəte tələbi tabe bə ni, de barzə vanqi dıjmon doe binoş kardə. Ərizəvon dilətonə məhkəmonədə, əçe pevolo kardə vərəğon de navsəçınə təşviğati band məzmunədə nıbe, dıjmon nıdoe, bə polisi tabe nıbe istiğamətədə hiççı nıkardeş iddio kardə. Əmmo dılətonə məhkəmon əçe arqumentonşon bə nəzə sə ni”.

De AİHM-i ğərari, hokumət 3 manqi dırozi bə R.İsaqovi 5800 avro,bə əlidə ərizəvonon har qılə 6000 avro təzminat doəni.
Ğərəz bımon bə ərizəvonon huğuği təmsiləkə 2000 avro doənine.