Azərbaycan Xalq Cəbhə Partiya (AXCP) dəstqirətiədə bə uzv, həmən partiya sərdor Əli Kərimli muhafizəvon bə Niyaməddin Əhmədovi oğətə 12 numrəninə cəzokəşə müəssisədə cəzo goə be xəbə doə bə.

De əçe əvlodon doə məlumati, Niyaməddin Əhmədov cəzokəşə müəssisədə bə cərimə kamera (“kars”) dənoə bə:

“Bey 6 sutkə “kars” cəzo doə bə. Səbəb, əçe kameradə hakimiyyəti tənğıd kardə şeer peydo kardə bə. Biçimi qorə cəzo doə bə. Hiç qılı cinayət nıkardə adəm de şəri dəstqir karde dılşon şərin bedəni, əyoən ıştə zulmi dəvom kardən”.
AXCP pevolo kardə xəbədə,, Niyaməddin Əhmədovi navədən beəsos bə “kars” dənoə be votə bedə: “Niyaməddin Əhmədov dəstqirətiədən bə təzyiğon məruz mandedə. De cürə-bəcurə vonon cəzo doə bedə”.

Niyaməddin Əhmədovi bə şeiri gqorə cəzo doə be band iddion Penitensiar Xıdməti munasibət zınə bedə ni.

Niyaməddin Əhmədov 2020-minə sori aprelədə dəstqirətiədey. Əv sıftə karantin rejimi ğaydon darışte iddio 30 sutka inzibati ğaydədə dəstqir kardə bəbe. In cəzo bə orəx rəsə ruj, əçe barədə cinayət ko bino kardə bəbe. Əv, de Cinayət Məcəllə 214-1 (terrorəti maliyyə kardelə), 28.281 (bə devləti əleyhi vanq) iyən 233-1 (de ğanuni mulki qardışədə icazə nıbə əşyon bə daşt varde, oğəte) maddon 13 sor ozodətiku məhrum kardə bə.