“Sosial şəbəkonədə virtualə mənəviə teroriston ko kardedən. Əvon fiziki teroristonku hiç fərğ kardedə nin. Əvon bo cəmyəti dəhşətin iyən xətomandin. Lozime ki, jıgonə şəxsiyyəton navi de ğanun bıgətəmon. Im vey mıhume”. Çımi həxədə fevralə mangi 1-nə rujədə parlamenti iclosədə deputat Sahib Alıyevi elonış kardə. Əy həmçinin votışe: “Ozobiconədə bəpe sosial şəbəkon barədə gıləy ğanun hozı kardə bıbu. Fik kardedəm ki sıvoy çımi KİV barədə ğanunən bəpe dəgiş bıkəmon”.

Ozobiconi parlamentədə çımiku bə navən internetədə sosial şəbəkon səpe kontroli ehtiyoci həxədə sıxanin məsə bıə bin. Məsələn 2018-nə sori martə mangədə Hadi Rəcəbli təklif kardəş be ki məmləkəti həmməy əroziədə sosial şəbəkəon ğədəğən kardə bıbun.