TolishMedia informasiya agentəti muxbir Yerevan şəhəriku xəbə dodə ki, fevralə mangi 12-nə rujədə çı Ermənistoni iminə vəzir Nikol Paşinyani parlamentədə ıştə hukməti pencsorə pırogrami mızokirə vaxtədə çı deputaton gıləyni pars cəvobədə Boku dovlətədə tolışi məsələ həxədə gəp jəşe.

Nikol Paşinyan ğeyd kardəşe ki, Ozobiconi tərəfi pidəşe Ğərəboği barədə mızokirə pırosesədə sıxanədə Ğərəboği Ozoboyconıjon icmo daxil bıkə. Ermənistoni iminə vəziri çimi həxədə elan kardəşe ki bı holədə jıgo beşedə ki, çı Ozobiconi pırezident İlham Əliyevi əsl həğiğətdə nımoyəndəti mandatış ni bo səçınonədə iştirok kardə həmməy əholi nomo mızokirə karde.

Nikol Paşinyani əlovəş kardə: “Əmə votedəmon: i dəğiğə çəş bıkən, mımkune ki şımə məmləkətədə co şəhrvandonən hestin ki Ozobiconi pırezident əvon təmsil kardedə ni? Bıvotəmon, məsələn Tolışə icmo. Aya Ozoboyconi pırezident əvon təmsil kardedə ya ne?”.

Bə yod dəğandəmon ki çan ruj çimiku bə nav bə “Hıraparak” nomədə rujnomə elani əsosi Ermənistoni parlamentədə hakimə “Çımı gəm” siyosiə fıraksiyə uzvon gıləyni de Ermənistoni iminə vəzir Nikol Paşinyani konfidensialə sohbəti təfsiloton okardəşbe. Davosədə Umumdınyo iğtisodiyə forumi çarçivədə Ermənistoni iyən Ozorboyconi rəison vindemoni vaxtədə Nikol Paşinyani bə Əliyevi votəş be: “Jəgobu, bəvədə Tolışon iyən Ləzgion bəpe mızokironədə iştirok bıkən”.