Ozobiconıjə huğuğə mıdofiəkor Ogtay Guləliyevi çı respublikə ğıvvə strukturon ıştə sərbozon kışte iyən işgəncəonədə ittihom kardəşe. Əy Tərtəri hərbiə məhkəmə 2019-nə sori yanvarə mangi 31-nə ruji ğərorış dərc kardə. Im Ozobiconi ləşğəri çan gılə sərbozon kışte iyən işgəncə doe məhkəmə koy ğərore. Im sərbozon de ermənion əməkdoşətiədə şək vardə bedə bin.

Piyo bə yod dənoə bə sərbozon 2017-nə sori mayə mangədə dustəğ kardə bən iyən tikəy bədigə bə xıdo rəhmət şən. Bə dığğəti loyiğe ki, kıştə bə 8 gılə sərbozonədə 4 kəs çımibəton bəroət doə bin iyən çəvon əzobədəon həbs kardə bən, əmma kışteədə ittihom kardə nəbin.

Guləliyev nıvıştedə: “Çoknə bedə ki, sərbozon de berəhməti kıştə odəmon əncəx bə 6 sornə zindonə cəzo məhkum kardə bedən iyən kışteədə ittihom kardə bedənin? Çoknə bedə ki, korpuson iyən briğədəon yolon, ki əyo ım “xəyonət” vağe bə, ıştə vəzifəonədə mandedən, əmma hərbi restəvonə sərbozon bə işgəncon məruz mandedən iyən cəzo doə bedən.

2017-nə sori mayə mangi 7-ədə çı Ozobiconi ğıvvə strukturon çan gılə sərbozon iyən şəhrvandon foş karde həxədə elon kardəşon be. Guya əvon Tərtəri rayonədə de ermənion əməkdoşəti kardedə bin. Cinoyətə ko okardə bə, əmma istintoği nəticon həxədə hiç vaxt məlumoton doə nıbin.