Ozobiconi ZİV ( Zıbudə İnformasiya Vasiton) – on 1 manqe bə Tolışi Milliyə Hımıjımı deştə nıvıştəyon hurrəcədən.  Vonən əy vardən ki, filəğət – bo çiçi bəpe tolışon barədə elmi konfranas Ermənistonədə dəvardo?! Jıqo çi bə Ozobiconi kardə miyonqəzətiey, kamfırsətətiey. Oxo əmə iqlə millətimon, tırk, tolış, ləzqi ımon həmə I millətin, bəpe iqlə zıvon ozobiconliyon zıvonədə qəp bıjənəmon. – Ve çoçinə koy, Ozobicon nomədə pesoxtə keşvərədə jiə bınəyniyə xəlğon tırki zıvonədə qəp jəy tovədə haştedən, çe əvon nomiən nodən ozobiconi zıvon. Odəmi çe əvonku parseş pidə, tolışi zıvon, ləzqi zıvon, tati zıvon, avari zıvon, saxuri zıvon, axaxtari zıvon, moğoli zıvon, lahıci zıvon, udini iyən çand qılə nomi nıqətə Ozobiconi bınəyniyə xəlğon binim bı zəminədə jidəna, çe əvon zıvon çe kom vırə zıvone? Bo çiçi bəpe tolış şımə zıvonədə qəp bıjəno, şımə zıvonədə bahando, şımə zıvonədə bınıvışto?!

Ox bo çiçi tolışşunosəti elmi komfranas tolışə zəminədə dəvardedəni, erməniyon zəminədə dəvardedə? Sovı bımiyən, tolış qavər bə şımə ğarzoxoy ya şımə nokəy ki, əy bə qılə vırə vanq kardeyədəy, əv şımə ray bıstəno, çəyo bə vırə bışu. Çəmə xosə mehmonon, əmə ıştən ıştə kəy xıvandimon, bə əmə nə şımə ray, nəən şımə ovardon lazim nin. “ Pəs bə ıştə ro, bız bə ıştə ro”. Xıdohafis. Əmə ıştə dusti de deşmeni ki bey, ıştən çok zınedəmon.

TolishMedia.