Turkiyə nizami ləşgər ki Siriya şimal-ğərb məntəğə Edleb viloyətı yolə baxşı bəştə tabekardəşe ın məntəğə Siriyavıjə merdon bəştə goropon tərəf cəzb kardedə iyən əvoni çı Liviyə iyən Ğərəbağı bandıkoə məntəğədə cang kardeyo vığandedə.

Almaniyə televeziya I minə kanaldə Oktiyabırə mangi 23-minə rujədə gıləy raport çı ın mıjdırə nizami ğıvvonku nişo doə bəy ki ıştə tale barədə ın cangonku ogardeədə sıxan kardəbin. Gıləy ın Siriyavıjə merdonku votdəbe ki əməni de duə vədəon iyən hiləgərəti ə cumlədə marzondə mıhofizə unvani bə cangiyə məntəğəon bardışone, əmmo peşo de məcburi bə cəbhə navnə riyə vığandışone.

Gıləy co Siriyavıjən votdə əvon həmonə ləhzədə ki bə cangiyə məntəğə rəsəyn, əvoni bə cəbhə navnə riyə bardışone. jığo be ki ha şəvon iyən rujon gullə iyən bombəon jiədəbin, Kali kəson kıştə bən iyən kaliən ve yarəjəbən.

‘‘Siriyavıjə merdon; top iyən gullə navədə gujd’’

İ iddə ın mıjdıron votəşone bə cang cəbhə şe ku bə nav çı cangiyə vəziyətiku hiç təcrubəışon bə nıbe, ıme ki ihsas kardən Turkiyə bəvonku de gullə navədə gujdi unvani istifodə kardedə. ın məsələ nəzədə bıgətdəmon ki Edlebı viloyətı veynə xəlğ beçoə iyən fəğırin jəğo ki veynə ın xəlğ kə yaən heç mandəvırəışon ni.

Gıləy ın mıjdoronku votdəbe az əgərsə deştə çəşi ıştə divojon yarəjəbıe iyən kışte vindəmbe əmmo ıştə jimoni dəvoniye goroş məcbur mandəbim ki bə cang dəşom. Əv votdə hiç roəm nıbe məcbur mandim ki 2 mang gıləy begonə ulkə cəbhə navnə riyədə bə cang dəşom, peşoən ki tob varde nıznime bəştə viloyət ogardim. In mıjdır votdə ki əgərsə ın cangıku de səloməti beşim əmmo Turkiyə nizamion ki ha mangədə 2 həzo dollar doe vədə doəşonbe kamil səy nişe.

Imrujən Turkiyə nizami ğıvvon sərkomandanəti Liviyə iyən Ğərəbağədə çı Turkiyə ofiseron dastədəy. Əmmo veynə əsgəroni ki cəbhə navnə riyədə bə cangin Siriya Edleb viloyətıku oməkəsonin.

İsa Tolış

Idoməş heste… .