Boku respublika həni zınedəni çiç bıkə. Bə Tolışston şə Rusiya tolışon vanq kardedən , ım vanq kardəkəsonən Boku respublika Dəvləti Xətoqordoniyə Ğolloğəvonətiye. Boku respublika bəy ıştə zıvonədə DTX (Dövlət Təhlükəsizlik Xidməti) votedən. Im deşmenon ənəndə bə conihəx dəmandən ki, həni zınedənin tolışon qəvon çoknəy dabaston, əvoni çoknəy lol bıkən.

Əve bə şəv bə ruj curbəcurə çəmon onedən, curbəcurə eçınon qətedən, tolışonən dənəşone bə ıştə kəcbəsəti mardənin ki, mardənin. Boku respublika dılışe çe Xıdo kardə Xıdoəti bə dast bıstənon, tolışi nəsım bıkən, demiyən bıvoton ki, həni çəmə bı pesoxtə keşvərədə nə tolış heste nəən çe tolışi kaşi. Çəmə bı pesoxtə keşvərədə dınyo hiç qılə dəvlətədə, hiç qılə keşvərədə bo mərdumon jimoni nıbə qirəvon hestin. Bə xosiyən çəmə kali kəloşonən de əvon qəvbəqəv doydən, hozon bo mərdumi bə qur ehaşte.

De jıqo sonon de jıqo beməxə fərzəndon tolış çoknəy ovc bıkə? Hələ əy votedənimon çə tonoən hukuməti (Boku respublika) ıştə kutlonış səğandəşe, hiskiş doəşe tolışi kutisə. Əvonən bənəy mardəloş hardə kaftori səqıniyn tolışi loşisə bə şəv bə ruj əy koşedən, tolışən ki bənəy vəncini orəxedəni sə bedəni.

Çe Rusiyaku bə Tolışston şə tolışonku parsedən: Zabil Məhərrəmov de İsmail Şabanovi əyo çiç kardedən, şımə əvoni vindon, de əvon əyşt – nışt kardedon? Çəyoən voten: şımə boçi bə azərbaycanliyon qırdəbemon bə çəvon onə dastqoon şedəniyon? Sovı bımiyən votedən: şımə boçi tolışi pərçəmi rost kardedon, oxo çəmə iqlə pərçəmımon heste. De jıqo – jıqo vinde bedə ki, əvon həni con doydən.

Qirəm qıləy keşvəy əyo jiyə mərdumi rəmziku (bı holədə pərçəm) tarsedəbu, bəvədə çə dəvləti, çə keşveri veyış mandəşni. Şımə diə bıkənən bı vironə Boku respublikadə İsraili pərçəm bəbe rost karde, Pakistani pərçəm bəbe rost karde, Tırkiyə pərçəm bəbe rost karde, mande iyo jiyə, bı zəminiro ıştə coni doə qılə mərdumi pərçəmi nom qəte əbıni. Ha ısət az votedənim, şımə bıvotənən- jıqo dard bəbe, bəpe ım dardi bə kom bandi bıvoti ki, əv ov nıbu nışu!?

Nəsir Ağayev