Bo vey muğğənion produyesserəti kardə, holiədə dəstqirətiədə bə Təranə Səmədova psixiatrik ekspertizaku dəvonə bəbe.

Bın barədə Boku Qonə Cinayəton Məhkəmədə bəçe koy diə kardə hakimon kollegiya ğərarşon doə .

Vey vaxt munasibətədə bə xonəxo şantaj, pul tələb kardeədə ittihom bə Təranə Səmədova 2023-minə sori fevralə manqədə dəstqir kardə bə.

Əv, məhkəmə vədə coyli ni, de ıştə ğeyri-rəsmi şuə, Rasim Həsənovi de eyni ittihomi muhakimə bedə .

Rasim Həsənov 2022-minə sori dekabrədə dəstqir kardə biboən, Təranə Səmədova himayədə dı kamsininə (13 inən 3 sin ) əğıli be bə nəzər sə bəbe, sıftənə istintağ mıddətədə həbs qətimko tədbir vıjniə bə nıbe.

Məhkəmədə ittihim elan beədə Təranə Səmədova de əyo nıvıştəyon rozi bə ni, ıştənış taxsiko zınə ni. Rasim Həsənov isə ıştənış ğismən taxsiko zınə.

Əvon de Cinayət Məcəllə 182.2.1-minə (de tars ehaşte tələb karde –navədə de dast-bədast bə de i qrup xonəxo tərəfo kardeədə) maddə ittihom bedən. Dın maddə əvoni 5 soriku tosə 10 sor ozodətiku məhruməti cəzo çəş kardə.

Təranə Səmədova 2017-minə soriən de inson savdı ittihomi 2 sor ozodətiku məhrum kardə bə be. 2019-minə sori de narkotik ittihomi qətə bə, 400 mənot cərimə kardə bə.