“AbzasMedia” sər redaktor Sevinc Vaqifqızı moə Ofelya Məhərrəmova pensiya kart blok kardə bə.

Bə Ofelya Məhərrəmova ım dekabri 15-də məlum bə.

Əv pensiya de noxəşəti band se, “Kapital Bank” bankomati ekranədə 326 mənot nuşu doe, əmmo puli bekarde mumkun nıbe votedə.

2023-minə sori noyabrədə Xətai Rayon Məhkəmə hiç qılı xəbərdorəti nıkardə “AbzasMedia” direktor Ulvi Həsənli, sər redaktor Sevinc Vaqifqızı iyən bə çəvon xeyzoni uzvon bank hesobon, pensiya iyən maaş karton blokoş noə.

De Ulvi Həsənli vəkil Zibeydə Sadıqova bə “Amerikanın Sədo” , məhkəmə ğərari beəsas be, çın ğərəriku apelyasiyə şikat karde fikədə be votəşe.