“Kanal 11” internet televiziya rəhbər, dəstqirətiədə bə jurnalist Teymur Kərimovi istintağ bə orəx rəse barədə əçe vəkil Nemət Kərimli məlumatış doə. De əçe vote istintağe oxoədə bəçe muvəkkili ziyodə ittihom doə bə.

3 manqisə vey dəstqirətiədə bə Teymur Kərimov de Cinayət Məcəllə 182.2.4 (de tars ehaşte tələb karde, xeyli miğdarədə əmlok bə daşt varde məğsədi kardeədə) maddə ittihom bedə be. Işət əv de həmonə maddə qılıən bəndi ittihom kardə bedə. Əv, həmən de Cinayət Məcəllə 182.2.1 (de tars ehaşte tələb karde, navəd daşt-bədast bə i qrup xonəxon tərəfo kardeədə) maddə ittihom kardə bedə. Çın maddon sanksiyonədə tosə 10 sori ozodətiku məhrumkardə cəzo nəzərədə qətə bedə.
De vəkili sıxani, omə rujonədə Teymur Kərimovi ko bə Boku Qonə Cinayəton Məhkəmə vığandə bəbe.

Teymur Kərimov ıştəni taxsiko zınedə ni, bəçe vəynə doə ittihomon beəsos be, bə jurnalist fəaliyyəti qorə dəstqir be votedə.

Ponə sori dekabri 11-də qətə bə Teymur Kərimovi barədə bo sıftənə istintağ mıddəti ro 4 manq dəstqirəti ğətimko tədbir vıjniə bəbe. Bəçe vəynə doə ittihomədə, video-reportajon mole ro dı kəsiku pul tələb karde iddio kardə bedə.