Çı TolishMedia informasiya agentəti mənbə Ozobiconi xarici koon vəzorətiku xəbə dodə ki, mətbuoti xıdməti rəis Leyla Abdullayeva bə Ermənistoni iminə vəzir Nikol Paşinyani təklif kardəşe Ğərəboği mınoğişə de sulhinə roon həll karde gorə mıvofiğə şərton hozı karde.

Əy həmçinin ğeyd kardəşe ki, bə əvon ro çı Paşinyani movge gıləy mıəmmoye. Əv həm cəhd kardedə Ğərğboği məsələ de sulhinə mızokiron həll karde, həmən Ozobiconi ıştə əholi bo cangi hozı kardeədə ittihom kardedə.

Jıgo beşedə ki, Paşinyani elonon çı Ozobiconi təcovuzkorə ritorikə sıbut kardedən iyən Ozobiconədə jiə bumiə xəlğon arədə bəştə mınosibətədə Ozobiconi siyosəti həxədə xəyli parson səbəb bedən iyən ım fakt Boku hokuməti yolə tarson bais bedə.

Bə yod dəğandəmon ki, fevralə mangi 12-nə rujədə Ermənistoni iminə vəzir Nikol Paşinyani parlamentədə elonış karde ki Boku dovlət Ğərəboği məsələ de hərbiə roon həll karde fikədəy. Sıvoy çımi əy ğeyd kardışe ki, Ozobiconi pidəşe sıxanədə Ğərəboği ozobiconıjon icmo mızokironədə daxil bıkə iyən jəgobu, bəvədə Tolışon iyən Ləzgion bəpe mızokironədə iştirok bıkən.