“ParsToday” informasiyə agentəti tolışə baxşi muxbir xəbə dodə ki çe AR Demokratikə ğıvvon “Milli Şura” ıştə nubətinə mitinğ bə noyabri 2-minə ruj təyin kardəşe. Mitingi dəvuniə vırə ya “Məhsul “ stadion, yaan ki, “28 may” metro stansiya nezonə meydon nişon doəşe.

Boku Şəhəri İcra Hakimiyyəti bı səfən bəvon Lekbatan ğəsəbə stadionədə ım tədbiri dəvunie ro icazə doəşe, əmo muxalifət bımi rozi bıə ni, ıştə tərəfdaron noyabri 2-ədə bə “28 may” stansiya meydon gırd bıe dəvət kardəşe. Çimi muğabilədə Boku polis mitinği bə nav “Milli Şura” tərəfdaron, həmən mitinği təşkilatəkon bino kardəşe dastgir karde. Mitinği təşkilati komitəku bə “Azadi radio” xəbə doəşone ki, polison oktyabri 30-ədə çe “Milli Şura” Koordinasiya Mərkəzi uzv Vahid Məhərrəmov ogətəşone. Əmo Daxili Koon Vəzarətiku bə Radio muxbiri parsi cəvob doəşonni. Həmonə ruji AXCP-kuən bə Radio məlumat doəşone ki, polison partiya fəalonədə Ruslan Əmirov və Əlizamin Salayevşonən çəvon kəyku bekardəşone bardəşone. Əmirov həmən çe Əli kərimli muhafizədə iştirakış heste. Polison sentyabri 12-ədən əvşon dəstgir və bə 30 sutkəninə inzibatiə zindonə cəzo məhkum kadəbe. AXCP Cıvonon Komitə uzv Emin Maniyevən de 30 sutkəninə zindonə cəzo mitinği təşkilati koyku təcrid kardəşone. Çe həmonə Cıvonon Komitə uzvon Cabbar Savalanlı və Abdulla Mahmudovən hələ 19 oktyabr mitinği ərəfədə dəstgir kardəşonbe, tosə ısətən əvon zindonədən.

“Amnesty İnternational” beynəlxalğə huğuğə mudafiə təşkilatiən polison bə dincə etirazə numayişkaron divon gətə əməli gorə Boku hokumət mızəmmət kardəşe, çey vədə jıgo gıley tələb noəşe ki, ıştə konstitusiyadə, həmən bə bəşəri huğuğon dair ratifikasiya kardə beynəlxalğə sənədonədə bo şəhrıvandon nəzərədə gətə bıə dinc gırdə bıe huğuği təmin bıko və bımi zəmanət bıdo. “Amnesty İnternational” ıştə bəyonatədə ımiən ğeyd kardəşe ki, Əliyevi hokumət respublikadə demokratikə prinsipon monitoring karde ro bə beynəlxalğə muşahidəkaronən  bə məmləkət ome ro icazə dodəni.