1-minə baxş
Dəvardə rujondə ve sıxanon iyən məğaləoni çı Turkiyə siyasət iyən əçəy nizami rəftaron barədə müntəşir bən.
Imruj pidəmone ki Turkiyə siyasəton çı Ozərboyconı barədə de əçəy bardə siyasət Ğətərı ülkə formədə analiz bıkəmon. De ın formə əsos sıftədə i gorop Turkiyə nizami şəxsiyəton gıləy müdafiə ğərordadı əncom doeyo bə Ğətər vığandə bedən. Peşo Turkiyə nizamiyə silahon iyən canqi avjoron bə Ğətərı ülkə qədə ləşqəri havatedən. Peşoən de Ğətər, İmarat iyən Səudiyə Ərəbıston ərədə pırablemonku istifodə karde siyasəton bə nav bardedən.

Pıroqramon bəpe jığo bə nav bışon ki Ğətərı podşo iyən çəy nezədə bıə kəson Ğətərdə bə Turkiyə nizamiyə ğıvvon ıştə əmniyətı zominəti ünvan bıznon. Jığoy ki Turkiyə əmniyət təşkilat pırogramoni təşkil kardedə ki ın ihsas Ğətarı ülkə hakimon arədə duz bıbo ki əqəm Turkiyə əsqəron ın ülkəkü beşon Ğətər de ve gonə pırablemoni dim bə dim bedə.

Ğətərı ülkə işğal karde formə ısət Ozərboycon Respublikədə əncom bedə. Jəğo ki mıəyən be Ğərəbağədə canq karde çı İlham Əlievı canq ni bəlkəm Rəcəb Təyyeb Ərdoğanı canqe. Jəğo ki Turkiyə məsulon ın canqi bərədə sıxan iyən ko kardedən Bokuədə xəbə ni, Ərdoğan ve cəhd kardəy har curəy ki bedə bə İlham Əlievı nışo bıdə ki Bokuədə Əlievı qoropı zominəti Ankaradə gıləy mafiyaiyə gorope. Əlbəttə bı səbəb be ki Ərdoğan iyən əçəy xəbəiyə mənbəon həmmə şəvon iyən rujon fəaliyətdəbin iyən əçəvon kali tərəfdaronən İronı Təbriz şəhrədə əktiv bedəbin.

İsa Tolış