Boçi Turkiyə həmmə Tırkə zıvonə ulkəon gıləy vəhdətinə timədə ğərordoe pidəşe?

Sıftədə Rəcəb Təyyeb Ərdoğanı məğsəd ın be ki de İslamiyə ulkəondə vəhdətin bıe hərəkət bıkə əmmo çand sor çimiku bə na əv ıştə əğidə dəgiş kardışe iyən dınyoədə Tırkə ulkəon vəhdətin karde pılani dumiədəye. Imiən əlovə karde lozıme ki: Imruj Rəcəb Təyyeb Ərdoğan çı bozə rangə neçi (Grey Wolves) nomədə goropı məğsədonku çı yolə Turani təşkildoe pılanı gorə kıməgəti kardedə.

1-minə kərəyo Tırk zıvonə ulkəon həmkoəti şura (Tırki şura) 7-minə iclosədə ki Boku şəhrədə təşkil be ın şuari unvan kardışe ki: 6 gılə ulkə, i gılə millət. Əv Bokuədə votdışe ki əgərsə əmə 2 gılə davlətımon heste əmmo I gılə milləti hırdənonimon. Ime ki har mərhələdə votdəmon əmə 2 gılə davlət iyən I gılə millətimon. Isət de Tırkə zıvonə ulkəon şura təşkil karde, votdəmon ki əmə 6 gılə ulkə iyən i gılə millətimon.

De ın tojə ideologiyə Ğəzağiston, Ğırğizıston, Tırkəməniston iyən Ozbəkiston bənə Ozərboyconi iyəndıku co nin. Əv ısət jığo təblığ kardedə ki Tırkiston çəmə əsliyə kəye iyən əmə həmmə gıləy 300 milliyoniyə ayiləimon ki i gılə zıvon iyən i gılə dinımon heste. Jəğo ki Əv bovəış heste guya Tırkəmən, Ğəzağ, Ğerğiz, Ozbək, Tacik iyən Turkəmən bə Turkiyə diyə kardedən iyən ın ulkə bənə ıştə kə vindedən.

Har vaxt ki Turkiyə lider çı Tırkə zıvonə xəlği ibıeəti barədə sıxan kardedə əçəy məğsəd ın vəhdəti vəzifə iyən təsir uzvbıə ulkəon iğtisodi-moli iyən ticorətədəye. Bı holədə har vaxt ki Turkiyə jornalon ın ibıeətiku sıxan kardedən bə Turkiyə silah iyən nizami ğıvvə ve diğğət doyedən. Ime ki bəbe vote Tırkon fikədə vəhdət iyən ibıe əncəx moli-ticorəti məsələdə ni, bəlkəm Pantırkistiyə nizamiyə ləşgəri duz dəvarde əçəvon əsos pırogramədəye.

Isət Ərdoğan bə ın nəticə rəse ki əncəx de ın vəsilə ki votdımone bəzıne ıştə ideologiyə çı Tırk dınyo ibıeətiyo bə vırə bırosno. Əlbəttə ımiən yodiku beməkən ki Ərdoğan bovəış heste ki 10 milliyon kəs tırk dınyo mıxtəlif ulkəondə jidən ki əçəy məğsədon bə nəticə rosniye gorə kıməgəti karde bəznen. Nakoən Ozərboycon respublikə pırezident İlham Əliyevən votdəış be ki bəçəmə məğsədon rəsye gorə lozım ni ki i gılə millət 2-gılə diasporəış bıbo.

Ərdoğan jəğo ki nakoən votəşbe bovəış heste ki həmmə Ğəfğazədə jiyə xəlğon bəpe bəvon kıməgəti bıkən iyən həmro bıbon. Əv ıştə sıxanondə Azərion, Tataron, Çərkəzon, Çeçenıjon iyən co kambə xəlğon nomi ilon kardəşe ki lozıme Tırk şura təşkil kardeədə bə Turkiyə dastək bıdən. Nəzədə bıgətəmon ki əv heç vaxt Taton, Tolışon iyən co İronıjə xəlğon nomi ki ın ceogırafiyədə jidən votə nişe.

Əleksandr Mixailofski gıləy Urusə nizami votdə ki Ərdoğanı həmmə sıxanon bənə gıləy hane. In tırkə ulkəon arədə ve pırablemon iyən kırizison hestin. Məsələn Ozbəkiston iyən Ğerğizıston arədə əloğon ve bevəcin. Əlbəttə ın ulkəon ki Turkiyə məğsədıku xəbəışon heste, hozı nin ki de Çin iyən Urusiyə dim bə dim bımandon.

Gasbo In ideologiyə veən ruşin ni ki boçi əvon cangi iyən nizami pırogramon hestışone, gasbo Ğərb ın ibıeəti dumiədəye. Əlbəttə bəbe vote ki əvon Asiyə Cənub-Şərği leveldə vəhdətin bıeədəd səbarz bımandon, yəne gıləy iğtisodi-ticorəti hissədə, ne NATO tırkiyə hissədə. Əmmo har şey ki bıbo Ğərəbağı 2-minə cangi bə peşt Turkiyə iyən Ozərboycon respublikə cəhd kardən ki ıştə nizami-siyasi məğsədon məntəğədə inkişaf bıdən.