150 milyon dələmurtədə ittiham bə – Naxçıvan Muxtar Respublika navkonə maliyyə vəzir Rəfael Əliyevi de Devlət Tamojniə Komitə tarifon tənzim iyən ovoştonə şebə navkonə rəis Mənsur Əsqərovi koy apreli 1-də Naxçıvan Qonə Cinayəton Məhkəmədə diə kardə bəbe.

Rafael Əliyev iyən Mənsur Əsqərov 2022-minə sori noyabrəda DTX Naxçıvanədə dəvonə əməliyyatədə dəstqir kardə bən. Bın əməliyyaton nəticədə dəstqir bəyon restədə Naxçıvan Tomojnia Komitə sərdor Səhət Həbibbəyli, Muxtar Respublika Şəhərejənə iyən Arxitektura Komitə rəhbər Hicran Rüstəmov, Penitensiar Xıdməti rəis Tofiq Həsənov hıstin. Əvon həmmə bə Boku – DTX istintağ təcridxonə sına vardə bəbin.

Əmmo holiədə iqlə Tofiq Həsənov dəstqirətiədəy, Naxçıvan Qonə Cinayəton məhkəmədə mühakimə bedə. Əlidəyon barədə dəstqirəti ğətimko tədbir vıjniə bıboən ozod kardə bən. Əmmo çəvon barədə cinayət koon xitam doə bəni. Bın rujonədə Rəfael Əliyev iyən Mənsur Əsqərovi həxədə cinayət ko istintağ bə orəx rəsə, ko bə məhkəmə vığandə bə.
Əvon həmmə de Cinayət Məcəllə 179.4 (xususən kulli miğdarədə dələmurt) iyən de əlidə maddon ittihom kardə bedən.

Rəfael Əliyev 2020-minə sori avqustədə de Naxçıvan Ali Məclisi sərdor Vasif Talıbovi sərəncomi Muxtar Respublika Maliyyə vəzir təyin bəbe. Tosə həmonə vaxti isə Tomojniə Komitə tomojniə tarifon tənzim iyən ovoştone şebə rəis bə.Peş Rəfael Əliyevi Mənsur Əsqərov əçe vırəş qətə.

Rəfael Əliyev 144 milyon, Mənsur Əsgərov 132 milyon mənot dələmurtədə ittihom bedən.
Dəstqir kardə bə peş bə ozodəti vadoə bə Tamojniə Komitə navkonə sərdor Səhət Həbibbəyli Azərbaycan Milli Elmon Akademiya prezident İsa Həbibbəyli zoe.